Moj profil
A kaj da danas kuham?" (518)
A kaj da danas kuham?" (518)

A kaj da danas kuham?" (518)

Znam da i vi kak i ja jedva čekate da nam dojdu nekakva normalna vremena i da konačno počnemo živeti kak je to bilo i do pred nekaj više od leto dana. Baš je ovo vreme nekak da se počne roštiljati v goricama, pred vikendicom ili pak vu vlastitom dvorištu. Mi smo v draganovečkim goricama najprije roštiljali na rešetki na dve cigle, onda smo kupili “pravoga” roštilja na nogarama da bi zadnjih par let to bila prava meštrija kak negda v našoj birtiji „Slaven“.Teško mi je zamisliti nekoga od dece do nas penziča koj ne voli pojesti nekaj na roštilju.

Prvo ovoletno roštiljanje

Pred par dana se Jan zaželel roštilja i naravno da su starci mam krenuli planirati kaj i gda to napraviti. Oko toga se ni teško složiti samo onda malo bolje pratite prognozu da vidite kak se pripremiti v slučaju kakve kišice ili vetra. Naravno da sam bil zadužen za pripremu mesa ali smo ovaj put malo ponudu i proširil. Daklem ovak sam to složil: čevapi i ražnjiči, bez kojih za decu roštilj nije roštilj, krmenadli, carsko meso i ovaj put, za mene, bogata svinjska rebra. Za prilog su osim več standardnih priloga bile i kapice šampinjona punjene sirom i češnjakom. Mesto kruha lepinje na pol zrezane i lagano prepečene na na masnoj rešetki. Niste valda pomislili da smo bili bez predjela? Kak i navek dok se čeka roštilj: od svega pomalo.

Moram vam reči nekaj o rebrima. Po svetu se jako često peču juneča rebra, naročito v argentinskim restoranima, ali su v našim prilikama meni bolša svinjska rebra. Morete ih peči rebro po rebro al ni loše pripremati tri-četri rebra v komadu. Malo se duže peče ali su jako sočna baš onak kak to vole pravi gurmani. Ovaj sam put fakat užival čak i dok su drugi dan bila zdena. Isto vredi i za recimo janječa rebra makar je Podravcima nezamisliva bilo kakva varijanta janjetine osim ražnja ili pečena v rolu. Makar je bil fakat bogati roštilj Jan je ipak pital:”Kaj nema vratine?” Tu vam nekaj moram priznati. Baš zato kaj je vratina nekakv standard ja izbegavam čistu vratinu. Od vratine delam ražnjiče jer su mi tak puno saftneši nego od same lopatice ili, nedaj bože, od buta.

Več sam znal koj put spomenuti kak se negda v Koprivnici  jel odličan roštilj dok ga je pripremal Štef Martinuš pri Sajdlu ili pak v Slavenu. Danas ga imate posvakud, morete kupiti gotovoga materijala za roštilj al sam nekak još navek sklon pripremanju mesa doma. Sam biram meso i sam ga pripremam. Nema čoveka koj priprema meso doma da nema svoj “tajni recept” kak nasoliti i napacati meso. Znaju ljudi meso nasoliti, dodati narezanoga luka i zalijati z uljem. I tak odstoji prek noči. Onda vam se zna dogoditi da vam na mesu ostane luk koj zagori a ulje kapa po žaru pa meso zna od vatre pocrneti. Ja ne kompliciram. Napravim smesu začina od soli, Vegete i malo papra. To ostavim prek noči vu večoj posudi i do sad još nisam fulal. Tak delam i z piletinom ali bocke i lopare spandlam a belo meso narežem na debelo tak da ostane sočno. Od piletine delam za decu i tzv “šarene ražnjiče”: falačec mesa, falačec paprike i luka i tak do kraja štapiča.

Tia uživa v roštilju v društvu mame, bake i dede

Moram kratko spripovedati malu povijest mojega iskustva z pečenjem roštilja. Još negda v gimnaziji moj pajdaš Cico i ja smo imali dve simpatije koje smo šteli nekak šarmirati i za to se pružila prva prilika dok njegve mame ni bilo doma. Moralo je to biti nekaj “posebno i atraktivno”. Seti se on da vu frizeru ima komad lepoga mesa od svinjskoga buta i da bi to moglo biti pravo meso za čvape. Naravno da sam se složil jer v to vreme nisam imal pojma kak se to dela. Zmleli smo mi taj falačec čistoga šnicla, začinili, zmešali ali se onda pojavil problem: gde to speči? Rešenje je bila rešetka v rolu. I kaj se dogodilo? Čisto krto meso bez imalo masnoče se jako skvrčilo a čvapi su počeli padati čez rešetku. Čisti debakl. Curice smo mogli ponuditi samo z nekakvim keksima i limunadom. Ni čudo kaj drugoga spoja više ni bilo.

Drugo je iskustvo bilo nekaj bolše. Moj stareši pajdaš Ifa me pozval da mu nekaj pomognem v goricama delati a on se bu pobrinul da imamo nekaj za prizalogajiti. I kaj je napravil? Osim falačeca suhoga bunceka lagano prohuhanoga vu vinu, napravil je i malo neobične čvape. Naime v mleveno meso zmešal je i malo naribanoga krumpira (?!). Priznajte da ste malo iznenađeni. Bil sam i ja ali su čvapi fakat bili jako ukusni i sočni.

Znal sam nabasati i na velke “stručnjake” koji delaju “fenomenalni roštilj”. Upoznal sam tak jemput čoveka, bil je čak i birtaš, koj je jednu moju deklu i mene pozval na “nezaboravni roštilj”. Bil je fakat nezaboravan. Bilo je tu svega pomalo, ništ posebno, al sam ja najviše očekival od pleskavici. I onda iznenađenje. Nikak da odgonetnem od čega su te pleskavice napravljenje i zakaj su tak neukusne. On vam je zapraf napravil faširano meso z puno kruha koje se nikak nije moglo speči. Čisti promašaj “velkoga roštilj-majstora”.

Kaj sve deti na žar?

Ovo kaj sam gore spomenul je kakti manje više “klasika” roštilja. No ima nekaj kaj se retko hiti na roštilj al je za neke sladokusce pravi specijalitet: brizli i beli bubregi. Neki dan sam to spomenul Janovoj ekipi i naravno da nisu znali kaj to je, a dok sam im objasnil onda su se šokirali. Daklem brizli su teleče ili juneče vratne žlezde a beli su bubregi, da prostite, bikova jajčeka. I jedno i drugo je teško nabaviti jer toga nema v normalnoj ponudi pa vam more pomoči samo dobra veza pri nekojem privatnom mesaru ili veterinaru. I za jedno  i za drugo treba nekaj vremena za pravu pripremu al se na kraju isplati. Imali smo svojedobno v Koprivnici jednoga veterinara koj je okolo po koprivničkome kraju škopil muške mlade neraste i junce i, ako gazda to ni štel potrošiti, on bi to zel doma i malo se počastil.

Ak se baš očete igrati dajte si malo vremena i truda i napravite rolice od krtoga mesa. Meso rastučite lagano kak za šnicle a v to zamotajte ploškice šunke ili lepoga domačega špeka. V tu rolicu morete dodati i falačec sira. To isto morete napraviti od pilečega filea koj je tak i tak sam po sebi suhi. Svojevremeno sam pak v Njemačkoj užival pri jednom našem poslovnom partneru v junetini koja je odstajala prek noči vu sojasosu. To se meso mora prije pacanja malo zamrznuti tak da se more rezati na mesoreznicu kak flispapir. To se doslovce hiti na rešetku par sekundi  i brzo obrne na drugu stranu. Ja sam tak nekaj slično napravil ze žrebečim mesom. Z tim odlično pašu kojekakvi pikantni preljevi.

E sad! Ima nekaj na kaj treba paziti ak ste pozvali jako šareno društvo. Jedni očekuju da bu meso baš onak reš pečeno, čak pomalo zgoreno, a drugi pak očekuju samo onak da malo dobi žučkasti bojicu a znutra je blago “sirovo”. Meni to paše baš tak.

Još reč-dve o pleskavicama. Rekli bute da to ni baš nekakva mudrost. Naš je dragi prijatel Slavo delal letima odlične pleskavice od čiste juneče vratine. To je na svim našim okupljanjima bila najtraženija roba. Ja sam pak od jednoga iskusnoga mesara na moru dobil ovakav recept: pol smese juneče vratine, frtalj smese svinjske vratine i frtalj smese janječega flama. Problem je v tome kaj vam mesar nebu prodal samo janječega flama nego morate zeti barem pol janjeta.

I kaj da vam velim. Na svojim sam putovanjima  po Ex-Yu jel na v svim mogučim mestima i restoranima. Od zagrebačkog Trnja i Velesajma, v Banjaluki, na Baščaršiji v Sarajevu, v Ljucu v Skoplju, pri Oraču v Beogradu, v Ljubljani pri  Aci Devetki, čuvenom nogometnom mešetaru. Jel sam čuveni “leskovački voz” v Leskovcu i pleskavice v janječoj maramici pri Gurmanu v Kraljevu. Koj mi je bil najbolši? Pojma nemam. Svi su bili odlični v trenutku blagovanja pogotovo ak ste v dobrom društvu i sve to zalijete z dobrom kapljicom.  

Pondelek

Juha:Krem juha od karfiola i brokule
Glavno jelo: Krumpir na ploške z nekolko šniti špeka, kiseli krastavci
Desert: “Ružice” od jučer, Ak bute žedni pomognite si sami.

Tork

Juha: Koprova juha z krutonima
Glavno jelo: Krmenadli na naglo, špinat, jajca na oko
Desert: Puding

Sreda

Juha:Kobasičja juha z kašicom
Glavno jelo:Francuski krumpir, cikla
Desert: Sok

Četrtek

Juha/Glavno jelo: Čušpajz od poriluka z kranjskima/suhim mesom
Desert: Američke palačinke

Petek

Juha:Riblja juha ala fiš
Glavno jelo: Lepi komadi rečne ribe v „tročanskoj smesi“, grah/krumpir šalata z koščičim uljem; ovo „tročanska smesa“ vam znači: kuruzno brašno, malo oštroga, sol, Vegeta, slatka/ljuta paprika
Desert: To bez dobroga gemišta nemre prejti.

Subota

Prošli sam tjedan predložil bogati roštilj a danas prejdite na varijantu B:kotlovinu ili peku.
Ja imam električnu peku koja je jako praktična dok je loše vreme.
Glavno jelo: Mešana peka z puno povrča.
Desert: Ja bum dal prednost Đuri da nekaj zmisli.

Nedela

Juha: Juha od goveđih kostiju z rezancima
Predjelo:Znate da se na „kostima“ navek najde par slasnih zalogaja meseka
Glavno jelo: Zagrebački šnicli, mešano povrče na putru
Desert: “Ružice” od lisnatoga testa filane z kremom od vnilije

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.