Moj profil
A kaj da danas kuham?" (514)
A kaj da danas kuham?" (514)

A kaj da danas kuham?" (514)

Dok bute ovo čitali setite se da je pred tri dana bilo Josipovo pa z malim zakašnjenjem čestitam imendan svim svojim Josipima koje sigurno imate i vi među svojim pajdašima. To je naše staro domače ime i teško bi se negda našla malo vekša familija koja da nije imala barem jednoga Jožeka. Setite se da je i naš negdašnji predsednik Tito bil Josip samo mi ni poznato jel on držal do toga datuma ili mu je ipak bilo važneše da mu donesu štafetu 25-toga svibnja. Kak bilo da bilo to mi je jedna od najvažneših sveci tokom leta.

Zakaj držim do Josipovoga?

Za to vam ima puno razloga. Od navek je oko mene bilo jako puno meni dragih ljudi z tim imenom. Moram svakak spomenuti mojega dedu po mami Josipa, Jošku z Koprivničkoga Ivanca jer sam njega najprije i upoznal a nekak mi se čini da je on bil jedna od najbolših ljudi koje sam igda upoznal.V mojem je detinjstvu on još navek bil glava jedne velke familije, za ono vreme dobro stoječe seljačke družine. Svako sam ferje, i letnje i zimsko rado provel bar desetak dana pri njemu v Ivancu jer je to nekak bilo čist nekaj drugo nego pri nam v Koprivnici. Veliko imanje z konjima, kravama, puno svinji, ogromni vrt i puno sestrični i druge dece v susedstvu. Celi dan smo se mogli igrati do mile volje, baka Jela je brinula da nas nahrani a deda da nas popela na senokošu ili čak v gorice. Posebno pamtim njegov odlazak v gorice. Nigda nije otišel a da ni zel nekaj za prizalogajiti. Obično je to bil nekakav falačec špeka, šnita kuruznoga kruha i obavezna bakina dobro začinjena prga. Dok prejdete četri kilometra do gorici, morate  nekaj malo prigristi i verujte da dobro legne čaša tuduma podrumske temperature. V njegovo vreme ni bilo ni govora ni o sodavodi a kamoli mineralnoj. Dok bi pak v pondelek dolazil v Koprivnicu na pijac navek je donesel nekakvoga pinkleca kojega mu je baka spremila baka. I to je znala biti prgica ili pak friški sir, pogača, kakav diganec od nedele ili pak sezonsko voče. Nigda nije došel praznih ruki i sva smo ga unučad jako imali rada. Ima jedna interesantna stvar kaj se tiče sedenja za stolom za vreme obeda ili večere. Deda je navek sedel na čelu stola, najstareši sin i njegva žena z njegve desne strane a mi deca gde bi nam odredila baka. Bake se nekak ni ne sečam preveč za stolom jer je njezin posel bil kuhanje i dvorenje mnogobrojne čeljadi makar je čini mi se bila žena koju se vu familiji jako slušalo i poštivalo. Deda nas je napustil na početku mojega studija i moram priznati da sam nekak zgubil veze z tom hižom. Sečanje na dedu Jošku je ostalo za navek v prelepom sečanju.

Mislite da je to jedini Josip v mojemu životu? Ni govora. Bilo ih je još al svakak moram spomenuti dva koji su bili ili još jesu dio mojega podužega života.

O Joški Gudiću, legendarnom koprivničkom kulturnom i sporstkom radniku sam nekaj napisal v mojoj knjigi “Ko to ne voli Podravce?” al nema Josipova da se moji prijateli i ja ne setimo i njega i kojekakvih zgoda z našega dugogodišnjega druženja. Njegov smo imendan znali proslaviti pri njemu doma, v birtiji al i v goricama. Svi kaj nekaj znaju o Josipovu znaju da je to orjentir za stare vinogradare. Svaki pravi vinogradar mora znati da se do Jožefova mora porezati gorice i teško da more imati nekakav izgovor zakaj do toga dana ni to več obavil.  Za nas male vinogradare to i ni nekakav problem jer retko ko baš ima više od hiljadu trsi i najviše nas je tu negde oko tristo-četristo trsi. V ovim letima čist dost da imamo vino za zapovedane svetke i sve ređe okupljanje pajdašije. Naravno da se na taj dan ni ni pomišljalo da bi se morti nekaj delalo oko gorici. Bil je to dan za blagovanje i kojekakve priče i zgode z našega života. No Joško je imal jednu interesantnu teoriju o radovima v goricama. Negda bi došli fakat nekaj delati al bi nas onda Joško “iznenadil” z pričom:”Jeste vi normalni?Znate vi kaj je danas? Danas se nesme mi pomisliti na nekakav posel v goricama!” Naravno da više nismo ni pomišljali na nekakav posel al nismo ni proveravali na kojega je to sveca točno mislil. Nareži kobase i špeka, donesi litru i vodu i vudri se spominjati. Joškin stari Štef,  bil je poznati  domači majstor mesar na koprivničkom Brežancu, letima je slovil za nezamenjivoga meštra kolini. Moram priznati da smo Slavo i ja od njega puno nafčili o delanju kolinskih delicija kak su kobase, prezvuršti i čurke. Njegove kobase su za Josipovo bile najčešče na stolu i moram priznati da taj okus osečam i dandanas. Nastojim se toga recepta držati još navek jer se pokazal kak jedini pravi. Samo neznam kome ga bum jednoga dana imal prilike prenesti?

Jedan moj Josip-Joško v jednoj ulozi koprivničkog Gradskog amateskog kazališta davne 1957.

Kak sam i rekel neki dan je bilo Jožefovo i moram se pofaliti da smo Đuro i ja uspeli več pred tjedan dana porezato trsje, znosili smo lozu i povezati lucnje. Moramo još prvi put pošpricati za preventivu pa smo koj dan mirni. Doduše znate da v goricama ima navek nekaj za delati a v ovoj nesretnoj situaciji to nam je i prilika da bumo bar na kratko na friškome zraku z nekaj malo više od “dva metra” odstojanja.

Stareši se Koprivničanci buju setili i našega velkoga pajdaša Josipa Povrženića Jose koj je več koje desetleče stanovnik naše metropole. Maturiral je v Koprivnici pred šezdeset let, letima igral rukomet z jednom legendarnom ekipom, delal kak inženjer na HŽ-u al znate več: dok se oženiš moraš slediti svoju životnu družicu. No Koprivnica je za navek vu srcu. Ak ste prečitali nekoj moj tekst o Martinju, Vincekovu ili nekom drugom goričkom okupljanju znate da navek spominjem i Josu, Boča i Atača kak ljude koji se navek odazovu pozivu vu draganovečke gorice. Znate kaj? Ovo leto dana kak se nemremo sastajati jako nam sve to fali. Nema Josinog telefonskoga poziva da ne planiramo “kak se moramo najti prvom prilikom” jer se takva praznina v našem druženju ne pamti. Josi sam takaj posvetil nekaj teksta v mojoj knjigi je su i on i svi drugi moji pajdaši dio mojega života koj se nesme nikak zaboraviti. Pedesetak i više let druženja je svakak nekaj kaj se retko najde. Kak nam se tih zadnjih leto dana nakupilo puno toga nadam se da bu uskoro ipak došla prilika za okupljanje naše klape i da se bumo imali prilike naspominjati onak v živo. Mobitel ipak ni prava zamena za živu reč. Moram vam nekaj iskreno reči. Kak Joso ima puno prijateli v Zagrebu koji ga bombardiraju z kojekakvim štiklecima, vicevima i prelepim slikama, v ovim mi je vremenima isporuka toga materijala znala biti pravo osveženje i razlog za malo raspoloženja. Samo tak nastavi Joso.

Zakaj je Josipovo važno za Lepu Našu?

Da nebi mislili kak je to ime i svetec važan samo v našim lokalnim okvirima moram vam reči da se slavi i v južnim krajevima, gde ga zovu Jozo, a zapraf je varijanti toga imena posvakud v Lepo Našoj. A morti niste znali ovo:Sveti je Josip  zaštitnik hrvatskog naroda? O tome sam pisal pred par let al danas tek tolko da vas podsetim da ga je još 1687. Hrvatski sabor proglasil zaštitnikom hrvatskog naroda. Znate kaj me zanima: Kolko o tome znaju naši vrli političari i dal buju koju reč prozborili o tom velkom svecu? Ja se bum pak na taj dan podsetil z ovotjednim jelovnikom jer znam kaj bi moja tri gore spomenuta Josipa rado pojeli na današnji dan a ja bum im se rado pridružil.

Pondelek

Ovo bi svakak preporučil Joso
Juha/Glavno jelo: Kisela juha od svinjskoga pajšleca. E sad! Kak je pajšleca teško nabavitibudu dobri i špek fileki.
Desert: Gemišt ili zdeno pivo.

Tork

Joško je znal sred tjedna nazvati i predložiti: Čuj Mali! Mogli bi skočiti do Vlaislava na
Glavno jelo: Janjetivu. Ne morate iti baš vu Vlaislav. Morete to napraviti i doma.Mala promena jako dobro dojde a tu su več i pripreme za Vuzem.  
Desert:A kaj drugo nego gemišt.

Sreda

Juha/Glavno jelo: Pretepeni grah; niko ni delel tak dobroga pretepenoga graha kak moja baka Jela.
Desert: Mazanica z orehima; ta se mazanica obično delala od onih obreski kaj su ostali od štrukli a to je pak najbolje na svetu delala moja mama Marica.

Četrtek

Ovo bi sigurno v jen glas preporučili i Joško i Joso
Predjelo: Domače kobase, malo prezvuršta
Glavno jelo: Pečene čurke/krvavice, kuhanu krumpir i dinstano kiselo zelje
Desert: Mislim da i sami znate kaj bi tu moglo pasati.

Petek

Ovak bi verojatno predložil moj deda Joška
Predjelo: Domači špek, dimljena prga i morti malo luka
Glavno jelo: Kuhana svinjska rebra, restani krumpir, kiseli vugorki
Desert: Čaša tuduma; ak nemate tuduma tu bu poslužil i domači gemišt

Subota

Ovo bi takaj moglo biti po dedinoj želji
Juha: Prežgana juha z jajcima i suhim kuruznim kruhom
Glavno jelo: Ščipanci z malim dodatkom kakvoga mesa
Desert: Pogačice z čvarkima

Nedela

Jedan tradicionalni podravski obed
Juha: Kokošja juha z debelo ribanom kašicom
Glavno jelo: Picek filan z nadjevom od jetrici, špeka i kruha, pečeni krumpir zelena šalata
Desert: Buftli z pekmezom

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.