Moj profil
A kaj da danas kuham?" (513)
A kaj da danas kuham?" (513)

A kaj da danas kuham?" (513)

Znam da sam ovaj tekst trebal napisati još prije par dana al za ovo nigdar ni kasno. Uostalom do Vuzma je još ohoho dana i more se još kojekaj promeniti. Morti bum i ja nekaj promenil za to vreme jer saki čovek ima pravo na promenu nekakve važne odluke. Morti se sečate da je negda davno onaj čudesni Salvador Dali rekel nekaj v ovom stilu:“Samo se budale ne menjaju“.To ne znači da čovek mora biti kameleon ali se tu i tam more malo korigirati.

Ne odričem se ničega

Zapraf bi vas štel pitati: Čega se ja još trebam odreči i zakaj? Prošlo sam se leto jako raspisal na temu korizme pa se probam podsetiti čega sam se ja to odrekel ili se pokušal odreči? Sve je zapraf ostalo isto, na istim sam razmišljanjima kaj se tiče odnosa prema odricanjima, osim kaj sam jedno leto stareši i bogateši za jedno veliko životno iskustvo. Ak ste me malo bolje pratili v zadnjih tri meseca onda znate kaj me to sve snašlo v privatnom životu. V mojim letima su odricanja ove vrste korizmane vrste nepotrebna. Za odricanja se buju pobrinuli moji doktori.

Kaj delati v korizmi?

Da vas malo “podučim” kaj je to korizma? Naravno da znate kak nisam ja to zmislil nego ljudi koji su profesionalci i z tim se bave od navek. Veli ovak.

Prema Bibliji ima opravdanja za te dane jer je opči potop trajal 40 dana, 40 dana je Mojsije boravil na Sinaju, Isus je 40 dana boravil v pustinji i nakon 40 dana je nakon uskrsnuča uzašel na nebo. Tak je to več vekovima ali naravno navek ima i iznimki.

E sad kaj nam je činiti v to vreme? Mam nam je na pameti odricanje od svega i svačega, zmišljaju kojekakvu samopokoru, zadaju si reč da nebuju pali v napast samo se bojim da su retki kaj zdržiju do kraja. To je vele ljudi i pitanje karaktera a svi znamo i onu staru jako rabljenu izreku:”Fučkaj ti karakter koj se nemre zgužvati!”

Ono kaj je za ovu kolumnu važno sigurno je odricanje od iča i piča. Tu su vam kojekakva razmišljanja i preporuke na temu posta i samo si treba zbrati ono gde bute ostalo dosledni i sebi i zadanoj pokori. Več sam davno čul da se ljudi stareši od šezdeset let i mala deca nebi trebali pridržavati strogoga posta. Daklem kaj se toga tiče tu sam bez brige. Kaj se pak dece tiče oni to i ne razmu i nije ih ni briga. Zamislite kak bi to zgledalo da našoj vnuki Tiji, koja ima nekaj više od dve lete, uskratimo meso a ona čim sedne za stol počne:”Baka meso!” Jedno mišljenje ili preporuka za katolike bi bila: Jedan puni obrok dnevno do sita?! I to vele obrok bez mesa! E sad smo v problemu. Kaj to znači do sita? To je jako rastezljiv pojam od čoveka do čoveka. Neko jede do sita kak ptičica a neko nikak da se nasiti. Najedete se recimo za gablec, morti i preskočite obeda, al bute vidli kak se bute osečali tam oko druge vure. Preskočite gableca i odlučite jesti malo jakši obed oko druge vure. Kak zdražati celo to vreme? Pogotovo ak gledate televiziju a v reklamama prikazuju kaj sve morete napraviti z Delimamo posuđem. Prava muka. Nekaj je blaža varijanta preoruka jedan velki obrok i onda dvaput nekaj malo prizalogajiti. To mi se više sviđa.

Ima pak i onih kaj imaju tzv “strogi post” svaki tjedan jedan dan. Naša kuma Vinka ima redoviti post svaki tork i dok bi mi obilno blagovali ona bi zela koricu kruha i pila čistu vodu. I tak več letima. Poštivam njezinu odluku i jako sam siguram da ja to nebi baš zdržal. Pogotovo ak bi ukučani jeli nekaj kaj mi jako paše.

Jedan je pak moj kolega držal strogoga posta svakoga petka. Problem je bil v tome kaj smo znali skup biti na istome poslu baš v petek i čudil bi se dok je on za vreme obeda znal šetati par metri od nas i popiti si eventualno kakvu mineralnu. Inače je bil malo “čudan” kaj se tiče prehrane. Nije jel ribu i janjetinu a bil je lud za kobasama. Jemput smo bili skup na nekakvom sajmu obrazovanja v Njemačkoj i samo je gledal od štanda do štanda gde su kobase. Posle treče vrste kobasi z tri različita dodatka lepo sam ga zamoli:”Čuj dragi prijatel. Meni je za prijepodne dost kobasi. Štel bi si za obed pojesti nekaj konkretno.” Ovo pak morti i nebute verovali. Dogodilo se v mojoj mladosti tu v Koprivnici, na terasi Slavena dok se tam pekel Martinušev roštilj. Naš jedan prijatel, inače poznati gurman, navek je lepo z nama naručil mešanu porciju i popil par gemišti. No jednoga dana bi on čim smo mi naručili krenul v šetnju. I tak par dana za redom. Da nije bolestan ili nekaj slično? Brzo smo mi otkrili jako “važne razloge” tome odricanju od tih delicija. On vam se naime zaljubil, bil je to vreme još navek stari dečko, i dobil je strogu zabranu od buduče. Nema ti druge nego se šetati i čeličiti svoj karakter. Verujte da ja to nebi zdržal.

Za utehu katolicima našel sam jednu interesantnu informaciju. Za pravoslavne vernike je post puno stroži. Kaj to znači nisam uspel saznati.

I da se vrnem na našu temu. Ničega se nebum odrekel ovi dana. Imam puno toga čega se čovek tak i tak mora odreči pa bum tak i nastavil. Ko da ja neznam kaj sve v ovim letima smem i morem?

Jelovnik za dane korizme

 Nadam se da niste pomislili kak bu to nekaj revolucionarno? Ni govora. Videl sam čist slučajno kaj jedan svečenik preporuča za jelovnik v dane posta. Zapraf  je to bil jedan poučan tekst da nekaj nafčite o korizmi a onda i podsetnik na neka jela koja su primerena tim danima. Rekel je jednu stvar koja se često čuje od ljudi dok je v pitanju post opčenito:”Kaj bum ja postil kad nisam grešen?” Ima v tome istine al je naglasak na nečem drugom. Nije samo stvar vu grehu nego i v zdravlju. Treba se malo ščistiti posle svih onih napornih dana posle zimskih svetki i kakti od teške zimske hrane koja je skoro svaki dan na jelovniku od studenoga do, recimo, kraja veljače. I još nekaj. Kak negda ljudi nisu imali škrinje jelo se meso z paca, suho meso z tavana, v podrumu je bilo sve manje krumpira, zelja i ostale zimnice i nekak je bilo normalno da se od Pepelnice do Vuzma jede malo skromneše.Sve v svemu negda se nekak više živelo v skladu z prirodom, ljudi su se prilagođavali mogučnostima. To je pak zahtevalo malo više snalaženja v slaganju jelovnika. Danas i sred zime imate svega kak sred leta.

Onda sam malo bolje pogledal kaj to ovaj svečenik preporuča za blagovanje čez celo vreme korizme? Nije to tak ni teško prihvatiti, neke stvari su mi jako bliske al naravno ak ih malo doteram i obogatim na svoj način. Ono kaj je važno da on malo jaču hranu preporuča samo v nedelu ili morti za nekakav zalutali svetek prije Vuzma.

Ima tu svega. Od posnih čušpajzi, testenine na sto načina, kaše, graha, nekaj manje mlečnih stvari, kojekakvih šalati, jajci i sličnih delicija. Nije to ništ preveč novo jer konačno ja to kombiniram i v svojem svakodnevnom jelovniku. No ima jedna preporuka koju bi mi Podravci teško baš do kraja poštivali. Kuhati bez masti a više se okrenuti ulju. E sad. Mam se ja setim mojega kuma Fjake i prijatela Pepeka. Kolko sam put čul da bi oni “kaznili svakoga koj bi mu spekel jajca na ulju”. Skoro da imaju i praf. Kak recimo napraviti temfanoga graha na ulju?  Ili kak napraviti zafriga za kolinjsko zelje na maslinovom ulju? Nebu išlo. Ja uglavnom kombiniram ulje i mast ali sve žive šalate delam na koščičnome ulju.

Odlučil sam da bum ovaj tjedan probal jelovnika složiti kolko tolko po korizmenim regulama a da se ipak ne odrečem ničega. Uostalom i Đuro mi saki čas „zanoveta“ da više delam z tim posnim namirnicama.

Pondelek

Juha/Glavno jelo: Kuruzni žganci z vrhnjem; znam da bi vi rajše z čvarkima al nije ni ovak loše
Desert: Dosta bu i nekolko mandarini

Tork
Juha:Prežgana juha z krutonima
Glavno jelo: Pileče jetrica na luku, hajdinska kaša
Desert: Nekakav sok

Sreda
Juha/Glavno jelo: Prisiljeno zelje z paradajzom; ak vam je to malo prozračno jelo dodajte bar par kobasi
Desert: Puding od vanilije

Četrtek
Juha: Krem juha od karfiola i brokule
Glavno jelo: Mesna pita, zelena šalata
Desert: Počastite se z laganim gemištom

Petek
Juha:
Glavno jelo: Grah-čušpajz bez mesa; dodajte malo povrča al svakak mrkvu.Da ga malo obogatite hitite v grah koju kožicu od špeka
Desert: Pogačice sirom

Subota
Juha/Glavno jelo: Špagete milanez; napravite “suhe” bez šunke ali z dostparmezana
Desert: Kompot od jabuki

Nedela
Juha: Juha od goveđih kostiju z rezancima
Glavno jelo: Juneča lopatica v sosuod češnjaka, restani krumpir, šalataDesert: Digana mazanica z vrhnjem i malo orehi

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.