Moj profil
A kaj da danas kuham? (511)
A kaj da danas kuham? (511)

A kaj da danas kuham? (511)

Zima nam je stisnula zapraf i nekak mi se čini da nama starešima baš i ne pašu ove nagle promene. Par dana proleča a onda nagli minusi. Doduše nismo v zadnjih leto dana preveč hodali okolo, više smo “ostali doma”, pa nam i ovih dana odgovara biti doma kraj tople peči. Čovek si najde kojekakvoga posla i dan prejde v času. Osim onih svakidašnjih poslova zadal sam si posla kojega odgađam več letima. Slažem velke vrpetine sliki koje letima čekaju da ih nekak razvrstam. Kak dugo bu trajalo? Pojma nemam.

Familijarno Valentinovo

Prošli sam vas tjedan dragi moji malo “prevaril”. Predložil sam na Valentinovo jednoga jelovnika za dvoje no onda se pokazalo da moram menjati jer smo odlučili pozvati goste. Znate da je lepše jesti vu malo večem društvu. Pozvali smo na obed moju setričnu Zvjezdanu i njezinu kčer Jelenu. Često ih znam spomenuti jer na nekim našim okupljanjima, v zadnje vreme doduše jako retko, nas četvero si napravimo kakav zajednički roštilj dok se moglo prek leta sesti na zraku v goricama. V takvim je prilikama glavna je Jelena jer joj je kuhanje naprosto strast.  Ovaj put joj to nisam dozvolil jer sam ja bil domačim i red je da bum ja “glavni”. Ni to bilo ono pravo Valentinovo al smo ipak od naših cura dobili mali poklon, ne samo Đuro i ja, nego i naša maca Mimi. V današnjim vremenima je svaki mali znak pažnje lepi početak druženja. Pred sam obed nazval je pajdaš Atač Zagreba, zaželel nam dobar tek, curama čestital Valentinovo i preporučil se za nekakav skori obed v Koprivnici. Dobro nam došel dragi prijatel.

A jelovnik? Ako vam se bu dopal pripremite si to nekakvom prvom prilikom

Predjelo: Malo šunke, malo domačih kobasa, lepinjice. To je bil pun pogodak jer smo naše gošče malo iznenadili.

Juha: od goveđih kostiju z rezancima. To nismo svi konzumirali jer Jelena ima svoju filozofiju: “Meni je juha kak pravi obrok pa mi pokvari glavno jelo”. Poštivam njezinu teoriju.

Glavno jelo: Lungič vu saftu od vrganji, domači rezanci

Desert: Romanov šnite, kava.

Kakve su to šnite morti vi znate bolje nego ja al vam se moram malo“pojadati”. Jako su zasitne i kalorične. Z tim nebi trebalo preterivati.

Z takvim obedom ideju naravno kojekakve naše teme razgovora. Toga nam nigda ne fali. Familija ima navek nekakve “goruče teme” koje nas v ovome čudnome momentu zaokupljaju. 

Jelena je pofotkala svoje seniore za vreme deserta

Fašnik i krafli

Nigda se nisam maškaral, ni kak dete. Zapraf neznam pravi razlog zakaj to nisam delal makar su druga deca z mojega kvarta znala obilaziti od hiže do hiže i skupljati krafle a morti su dobili i kojega dinara. Posle su te kvartovske maškare preselili na glavni koprivnički trg a kaj se događa zadnjih par let nemam pojma. V našemu podravskom kraju su maškare bile dugo v modi za vreme svadbi. Maškarali su se ljudi koji nisu bili pozvani na svate ali su skoristili priliku da naprave malo štimunga a domačini nisu mogli biti tak bezobrazni da ih ne pozovu na večeru i na piče. Znalo se dogoditi da maškare zaplešu z mladenkom i mladencom. To se ni moglo odbiti. Neko od maškari je i odrecitiral kakvu šaljivu popevkicu, naravno na račun mladenci.

Jednih se pak maškari jako dobro sečam i to v Opatiji. Došel sam delati dan prije maškari v hotel Adriatik i nekak mi je bilo čudno da vu veljači nemreš najti mesto za parkiranje. Đuro se jedva nagurala v nekakav kut iza hotela. Tek smo na recepciji doznali da ima puno gostiju jer su drugi dan poznate opatijske maškare. I fakat je drugi dan Opatija bila krcata z grupama maškari z celoga primorskoga kraja ali i z inozemstva.

Kak smo mi proveli fašenjka? Naravno da ni bilo nikakvoga maškaranja al su se pekle nepregledne količine krafli. Đuro je čak uspela neki dan za probu speči krafle od svojega brašna i dosta su dobro uspeli. No ovaj put su bili oni pravi. Napravi velku smesu ostavi da se jedno vreme testo odmori i digne. Onda na scenu stupaju sestre: Violeta i Đuro. Imamo velkoga pekača na struju koj drži stalnu temperaturu masnoče a v jednoj rundi stane i desetak krafli. Morem vam reči da mi je najbolje pojesti par krafli onak još topli ili još je bolje jesti one “trokutaste jastučiče”  koji ostaju na kraju kakti “otpatki”. Dok je sve gotovo počne dioba. Ima dosta za sve: za obadve familije i njihovu decu i vnuke. Nek se zna da je fašnik. Ako pak nekaj ostane,a navek ostane, moreju se pritopiti v mikrovalki i malo nafilati z finim domačim pekmezom.

Ovak su zgledali naši krafli

Al znate kaj? Danas krafli nismo tak baš želni jer ih morete kupiti kad se setite. Sečam se da smo sred leta v Milni kupovali svako jutro krafle jer je to deci baš pasalo. No tradicija se mora poštivati, bumo pojeli svoju porciju krafli pa smo za koje vreme mirni.

Jan ide v Osijek

V ovo vreme korone sve je zmešano pa kak verojatno i znate, ni škole ni fakulteti ne delaju normalno. Dok je Jan prošli petek došel na obed rekel je da odlazi v Osijek jer ima kolokvije i ispite. Onak je usput dobacil:”Skuhajte mi nekaj kaj bum imal za celi tjedan!” Ni problem skuhati al morate biti praktični. Onda smo se podelili ovak. Mama Irena mu je  kupile sve kaj bu imal za gablec i večeru. Baka Jasna mu je friško spohala par komada piceka, kaj mora pojesti brzo a na meni je bilo da dam svoj prilog. Srečom kaj smo v škrinji imali još lepu porciju sarme a ni mu teško kakti prilog skuhati dva-tri krumpira. Imal sam i spremljen lepi falačec svinjske lopatice pa sam mu napravil krmeči paprikaš. Uz to si more skuhati bilo kakvu testeninu i ima jedan fini obrok. Baka mu je ponudila i romanov šnite al ju je odbil jer kakti v zadnje vreme ne jede kolače. Neznam kak da to protumačimo? Možda je nekakav viši razlog?  Z druge strane tak ne gubi vreme za odlazak v studentsku menzu. Ima sve doma, na brzinu pritopi kaj ima, doda nekakav prilog i obed je tu. Doduše veli da osečki studenti imaju dobru hranu kaj me i ne čudi. Gde se bu dobro jelo ak ne v Slavoniji? Štel ne štel setim se svojih studetskih dana i stvarno problematične kvalitete jelovnika v Studentskom centru. Celo vreme studija sam imal samo mesec dana blokove a bar sam pol prodal i otišel na nekakav sendvič i jogurt. Ak se sečate več sam ranije spomenul kak ipak nisam bil “obični student”, bil sam muzikant pa se navek našlo nekaj love za pristojan zalogaj. Čak se znalo negda i preterivati.

Pondelek

Juha:Krumpirova juha
Glavno jelo:Jetrica na naglo, pomfrit, kiseli krastavci
Desert:
Znate da bu kolači od jučer.

Tork

Juha: Koprova juha z krutonima
Glavno jelo: Čurke z restanim krumpirom, turšija;
ak vam se oče zdinstajte malo kiseloga zelja
Desert:
Nemam pojma. Bum zmislil v zadnji čas.

Sreda

Juha/Glavno jelo: Sekeli gulaš; on navek paše v ove zimske dane a za dan-dva bu još i bolši.
Desert: Kompot od jabuki;
jedan lonec kompota je navek pri ruki.

Četrtek

Juha/Glavno jelo:Pileče-povrtni ragu; zmešam pilečega sitniša i kojekakvo povrče. To nam navek paše.
Desert:Zapečene palačinke sirom

Petek

Malo se bumo danas počastili. Našel sam v ribarnici file od grgeča. Jest da je skup al se isplatilo.
Juha: Juha od šaranovih glava

Glavno jelo: Grgeč na podravski, kuhano mešano povrče.
Kaj to znači na podravski? Dobro sam ga namočil samo v jajca i kuruzno domače brašno. Zgleda kak da je na pariški al mu kuruzno brašno daje poseban tek.
Desert:
To nemre prejti bez gemišta od graševine.

Subota

Juha/Glavno jelo: Špaget ala karbonara. Denem dosta špeka a ne štedim ni na parmezanu.
Desert:
Dobar bu jedan domači sok.

Nedela

Predjelo: Ogulil sam meso z kostiju a  z malo soli i falačec kruha odlično predjelo. Posle toga predjela skoro vam ne treba ni glavno jelo.
Juha: Juha od goveđih kostiju;
zakuhal sam krpice i leberknedle.
Glavno jelo: Juneči šnicli v saftu, luleki od kolko-tolko testa, šalata
Desert:  Štrukli od jabuki

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.