Moj profil
A kaj da danas kuham? (508)
A kaj da danas kuham? (508)

A kaj da danas kuham? (508)

31.1.2021.ivan944

V ovih tjedan dana vam se dragi moji puno toga promenilo. Ipak smo “proslavili Vincekovo” a imali smo i koline koje nismo trebali imati. Morete vi planirati kak očete al onda nekaj iznenada iskrsne i morate se prilagoditi novoj situaciji. Za takve iznenadne situacije imam ja Atača i Đuru. Iznenađenja na sve strane. Al idemo po redu.

Nigda takvo “Vincekovo”

Priča vam ide ovak. Nazove mene koj dan prije Vincekova Atač i veli:

“Čuj stari. Kaj mi nebi ipak mogli proslaviti Vincekovo?”

“Imaš predlog kak da to napravimo?”

“Gle ovak. Svi buju dečki došli z maskama ali maske moraju imati rupicu. Gemišta bumo pili čez onu zvinutu slamku!”

“Bravo Atač. Kak se ja nisam toga setil. Dojdi v Koprivnicu pa bumo barem ti i ja tak obiležili Vincekovo.”

I došel je al vam je naše čudno, a nadam se zadnje takvo Vincekovo, ovak zgledalo.

V gorice smo posle obeda došli Đuro, Jan i ja, i samo kaj smo otprli klet fakat je doletel Zagreba i Atač. Jan je donesel pol litre vina a Đuro nas je okinula z mobitelom.  Ova vam slika more dočarati kak je zgledalo Vinvcekovo 2021. v Draganovcu, v Mirnom dolu na broju 24. Jako tužno.

shimmer fallback

Atač, Jan i kletodomačin obiležavaju“nezaboravno” Vincekovo v Draganovcu

Posle više od pedeset let sve je spalo na nekakvu simboliku. Kaj bi dala sva naša pajdašija koja nas je napustila v samo par let, kak i oni koji su doma v nekakvoj dobrovoljnoj samoizolaciji, da moru biti z nama?

Znate kaj je još veča tuga. Vincekovo je bilo v petek, bilo je oko četri vure popodne a na celom bregu nije se čulo ljudskoga glasa a kamoli nekakva popevka. Totalna tišina. Tak nekaj je teško zamisliti na bregu koj od navek jako poštuje goričku tradiciju. Iskreno se nadam, i verujem, da buju ovi, al i drugi podravski bregi, oživeli z prvim naznakama proleča. Pa za koj dan bi trebali krenuti i prvi gorički radovi. 

Ipak smo imali koline

Morti se bute setili kak sam nedavno kukal još tam v studenome kak nebu ni kolini. Zapraf je to bil i čvrsti dogovor. No navek je v hiži neko malo veči gazda. Sve se lepo dogovorite, denete točku na i al onda tam jedno jutro oko kave počne ovakav razgovor:”Znaš ja sam se jučer navečer čula Slavom pa mi je rekla da bi mogli v subotu napraviti koline po pol pajceka z njima. Oni su našli mesara koj bu napravil prvi dio posla a mi bi samo morali dojti oko devete vure po svoje meso”.

Kaj bi sad ja trebal reči  na to  kad su se Đuro i Slava več sve dogovorile? Sedni v subotu v auto odi do Gole i zemi svoju polovicu krmeta. Sve je to lepo al treba imati dost snage da dovršiš koline kak bog zapoveda. Moraš napraviti i proizvode a to je onaj najteži dio posla. V tom se završnom poslu sve promenilo več zadnja dva leta. Desetlečima vam je to ovak zgledalo. Glavni je majstor bil Slavo a ja prvi pomočnik. Znal me je negda pitati: “Ivo. Buš i ti mesar dok buš velki?” Onda nam se negda davno pridružil Braco a onda pred fanj let i Robi. Sad vam se sve promenilo. Robi se pretvoril v majstora kobasičara a ja v prvoga pomočnika. Zapraf, istine radi, moram priznati žensku dominaciju na tim mesarskim poslovima. Ja više dojdem kak savetnik i stručni suradnik. Oko proizvoda  bila je prva Violeta, pa  Jelena, a Zvjezdana i Đuro su ordinirale oko kuhinje i svih ostali pomočnih posli. Kaj bi mi bez žena?

shimmer fallback

Tak se delaju kobase: Violeta, Robi i ja

Ovo smo leto imali jednu veliku pomoč jednoga “eksperta za kobasičarstvo”. Atač je v savetima nadmašil sam sebe. Kolko je on imal “interesantnih, korisnih sugestija i uputa” to vam je teško i zamisliti. Pa gde se svih tih leta samo skrival? Mam se je latil mobitela i savete i informacije o mesariji podelil z pol Koprivnice i malo Zagreba. Svaka ti čast prijatelu. Buš i ti mesar dok buš velki?

Koline su donekle sličile na one nekadašnje samo po jelovniku. Spekle su cure jetrica na naglo z puno češnjaka a sprobavali smo i smesu za kobase v obliku pleskavici. Morate osetiti kakvoga buju okusa. Novost je bila kaj smo imali i desert jer je Jelena donesla dve vrste kolača a Đuro je donesla i “staru” kuruznu zlevanku od dan prije. O pravoj kolinskoj večeri nije moglo biti ni govora. Umor je bil preveliki da bi nekome palo na pamet još i večerati. Čak smo drugi dan pekli čurke i kuhali kolinsko zelje.

Imam svoje ljud za sve

Kad smo več pri mesariji moram vam reči,a to verojatno znate i sami, da je strašno važno imati “svojega mesara”. Ne samo onoga za koline nego i onoga za svaki dan. Ja sam to od navek imal. Stari se buju Koprivničanci setili legendarnoga Štefa Martinuša koj nas je kojekaj nafčil a bome v kriznim vremenima, za vreme nestašica mesa, znal i spašavati v nekim situacijama. Tak jemput dojdemo kum Fjaka i ja k njemu po meso za roštilj a on veli:”Ote k susedu Šestaku i donesite ono kaj ja pijem i dojdite za pol vure!” Znali smo da se mora “rešiti” nekih drugih mušterija da bi mogel zvaditi onu “robu” za nas. Problem je znal biti kaj smo morali kupiti roštilj robu al i nekakvu “privagu”. Znal je reči:”Vi se bute mulci gostili v goricama a kaj buju jele doma vaše žene”. I bil je v pravu. V ovome gradu posle nigda niko nije znal delati tak dobar roštilj. Njegvi čevapi v Slavenu se nemreju zaboraviti. Danas ja imam “svojega mesara” Tomeka v “Mesecu” i moram vam reči da je več skoro dve lete suradnja na zavidnm nivou. Nadam se da bu tak još dugo. Ovo je za mene jako važno al ako bolje razmislite morate imati i puno drugih majstora koji znaju nekaj napraviti oko hiže ili oko vas osobno.  Siguran sam da ste se jako vezali recimo uz svojega brijača ili frizera. Ja sam vam recimo letima šišal pri gosponu Stankulinu, legendarnome koprivničkom brijaču tu na vuglu prek puta “Gramineje” v staroj Greglovoj hiži. Ruku na srce to ni baš bil brijač za klince jer su se pri njemu uglavnom skupljali njegovi vršnjaki i ozbiljna gospoda koja je znala oprezno razglabati i o politiki. Jedan je poznati koprivnički sudac jemput izgovoril “nezgodnu rečenicu” koja ga je koštala položaja. Rečenica je glasila:”Tito lutalica i Jovanka smijalica”. Ne sečam se jel završil v reštu no to mu je pomoglo da postane poznati advokat. Dok je gospon Stankulin zaprl brijačnicu, prešel sam k Tirli, pa posle njega v neke frizeraje.

Morate imati i svojega zubara, familijarnoga doktora, ali i svoju kumicu na pijacu koja vam nebu podvalila grincajga “ze svojega vrta, kojega je nabrala baš danas v jutro”, a dolifrala ga je baš jučer od prekupca Zagreba. Za jajca imamo dva izvora. Jedan je z Gole a drugi z Draganovca. Cena je ista kak i v dučanu a o kvaliteti da i ne govorim. Imam poverenja v te kokoši jer ih imam prilike videti kak pasu po vrtu.

Kak sam pak tehnički potpuno nepismena osoba nekak sam uspel nabaviti i majstora za vodovod, elektriku, centralno grijanje i druge železne usluge. Posebno mi je važno da sam, bar za neko vreme, nabavil majstora informatičara koj je tata-mata za kompjutere.

Mogli ste z ovoga svega skužiti da mi je nekak mesar najvažneši. Kuhara do sad još ne trebam jer kak znate još navek čvrsto držim kuhaču v rukama. Strašno me veseli kaj morem nekome skuhati, drago mi je kaj morem nekome napraviti ugodu a lepše je ponegda i pojesti pravoga zalogaja v društvu z pajdašijom. Lepše je jesti v društvu. Ljudi trebaju ljude i zato jedva čekam nekakvu prigodu da se morem sresti z mojom pajdašijom.

Pondelek

Juha: Paradajzova juha z kašicom

Glavno jelo: Čurke, restani krumpir, turšija.

Desert: Znate več: diganci od jučer

Tork

Juha/Glavno jelo: Sekeli gulaš. Ja ga kuham bez vrhnja a vi ga dodajte ak vam paše.

Desert: Pojma nemam kaj bi tu moglo pasati? Zberite si sami.

Sreda

Juha: Juha od flama z rezancima

Glavno jelo: Kuhani flam, pire, luksos

Desert: Vočna šalata

Četrtek

Juha: Jedna Podravkina z vrečice

Glavno jelo:Pileči rižoto, cikla. Najte štedeti na parmezanu

Desert: Kompot od suhih šljivi

Petek

Juha: Riblja juha od šaranove glave i repa. Z malo mešanoga povrča morete dobiti finu juhicu.

Glavno jelo: Šaran v kuruznom brašnu i krumpir šalata. To vam dojde kakti riba na kotlovini.

Desert: Kaj drugo nego dobar gemišt od graševine

Subota

Predjelo: Mesto juhe bum napravil paštetu od jetrica. Stostam malo kruha, dodam malo putra i namažem paštetu.

Glavno jelo: Špagete karbonara

Desert: Čaša crne pive

Nedela

Juha: Juha od svinjskih kostiju z leberknedlima. Ljudi ne veruju kak je to fina slatka juha. Naravno z pravim dodatkima povrča i kocke goveđe juhe.

Glavno jelo: Pečena krmeča lopatica, pekarski krumpir, zelena šalata

Desert: Diganci z makom i ružičkima

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.