Moj profil

A kaj da danas kuham? (480)

19.7.2020.ivan944

Makar sam v Draganovec došel 1963. to baš ni dugo trajalo samo z jednoga razloga: bil sam v to vreme, između 1963- 1969., jako zauzet kak muzikant. Bilo je jako puno gaža po Zagrebu i svako leto po par meseci na jadranskim terasama. Tu i tam bi navrnul v Koprivnicu, pa i v Draganovec, al sam ipak bil povezan prek pajdaša Fjake. Bili smo cimeri v dva stana i naravno da je česta tema bil baš Draganovec.

Od sv Vida do Draganovca (2)

V Koprivnicu se vračam zapraf 1970. dok se zapošljavam v Podravki a totalno se predajem Draganovcu i goricama posle povratka z vojske. Tu je nekak počel moj gorički kuharski staž. Mlada gorička ekipa je do mojega dolaska takaj znala za dobru papicu al se uglavnom sve doneslo od doma da se ne gubi dragoceno vreme za zabavu i bezbrižno druženje. Ja sam bil vu dobroj kuharskoj formi još od studentskih dana jer sam kuhal i cimerima Fjaki i Micoju a i skoro jedno celo leto gazdarici teci Bari i cimeru Fjaki. To zadovoljstvo držanja kuhače se samo nastavilo i v goricama. Doma to nisam delal jer sam v to vreme bil još stari dečko pa je doma kuhala mama.

V gorice smo v to vreme hodali peške, onda prešli na bicikle pa tek nekak v drugoj polovici sedamdesetih  tu i tam je neko imal auta. Mene su ljudi več prepoznali po tome kaj sam posle radnoga vremena del na guvernal bicikla onoga velkoga mesarskoga cekera i krenul do Radićeve, gde me čekal Fjaka, i onda put Draganovca. Dok smo pak putovali na četri kotača to je ovak zgledalo: dojdemo doma z posla, na brzinu obedujemo, Fjaka dolazi po mene v Ivanjsku, pokupimo Pepeka na Starom Brežancu i pak put Draganovca. Onaj mesarski ceker je sad bil v prtljažniku z namirnicama za taj dan. Znate kaj je bilo interesantno?  Svi smo doma dobro obedovali ali je dolazak v gorice skoro vu pravilu zgledal ovak: otprli bi klet, znesli jednoga stoleka i tri stolca, Fjaka bi rekel da nekaj malo narežem (jegera, špeka, kobasu, sira ili...), a Pepeka je zamolil da donese litru i vodu. To nam je došlo kak zakašnjeli desert i vreme za komentar događaja dana. Tek bi onda krenuli obaviti nekakav posel v goricama. Naravno ak nije pala još jedna litra i voda.

Tih let v sedamdesetim mi smo v goricama uglavnom bili pomočna radna snaga jer je deda Jendraš od navek imal svoje vincilire koji su ostali verni Pavlovićevoj familiji i posle dedine smrti. Ivek Remenar i Jožek Rozman su špricali gorice, a Ivek i njegova vredna ženica Gabrica su vezali, plevili i štucali gorice. Bilo je lepo videti tak zriktane gorice. Redi su bili poredani kak vojska. Vekši posel je za nas počel z pripremom za berbu. Staro vino je trebalo pretočiti a bačve zrivati na podolje i dobro ih oprati. Dobro oprana bačva je bila garancija da bu i vino zdravo. Sečam se da bi posle svakoga pranja došel gazda pomirisati bačvu i nejčešče rekel:”Još jedna voda!” Čvrknja i ja bi rekli “V redu gazda” i čim bi Fjaka otišel v klet mi bi bačvu deli na kamionsku gumu onak na koso da se cedi i za koju minutu pozvali gazdu da pak prekontrolira. Ovaj je put bil zadovoljan a i mi smo bili sretni zbog te male prevare. Vincilir Ivek je imal jednu jako važnu zadaču na sam dan berbe. Bil je več v letima i nije delal po goricama al ga je Fjaka navek na dan berbe zval da obavi jedan stručni posel: kontrolu čistoče bačve i zapiranje bačve prije nego ju spustimo v podrum na gantare. Spuštanje bačvi v podrum po vuskim štengama je zahtevalo dosta snage jer hrastova bačva od sedamsto litri ni baš mačji kašalj.  V današnje vreme je to puno lakše z ovim modernim inoks-bačvama. Em se lakše operu em su puno lakše za nositi.

Svojedobno je  je v Pavlovićevoj kleti bila tradicija održavanja nedelnih familijarnih obedi. Išla bi cela senior ekipa, dve-tri obitelji, peške v gorice i čim bi došli morala se popiti rakijica kakti protiv upale pluča. Domačin je imal prijatela, Čiku Ilića poznatog koprivničkog advokata, koj je letima bil glavni kuhar dok su ostali bili zaduženi za pomočne poslove. Kuhari su se navek cenili. Naravno da ja v tome nisam još sudeloval no to spominjem radi jedne poveznice z Čikom Ilićem.  Dok sam ja počel kuhati v kuhinji kraj peči je još navek visel njegov fertun z natpisom “Čiko”. Kak nisam imal svojega fertuna nosil sam toga dost dugo pa čak me naš legendarni konobar Viktor jedno vreme i zval Čiko. Morti ste pomislili da se tu jelo nekaj onak na brzinu tek tolko da se mogla popiti čaša vina? Ni govora. Kuhalo se puno toga na žlicu, kojekakvi paprikaši, pečenja a kak je Fjakina mama Lela bila vrsna kuharica navek je bil i nekakav kolač za desert. Uostalom sečam se da sam v kuhinji nasledil i vrpu suđa za jedne male svate ali i kojekakve namirnice i začine.

V to vreme mojega dolaska v Draganovec ta su koprivnička gospoda imali i jedne “zadružne gorice” z četri vlasnika: Vilko Pavlović, Jozo Bareza, Čiko Ilić i Vendelin Kovač, Fjakin deda po mami. Bile su nekakvih tristotinjak metri višeše od naših gorici a i tam je glavni vincilir bil Ivek Remenar. Mi mlajši nismo baš imali prilike koristiti tu klet za naša okupljanja ali se sečam da sam kuhal v zadnjoj berbi prije nego su promenile vlasnika.  Posebno pak pamtim da je vino z tih gorici bilo na proslavi moje diplome. I jedna mala anegdota z toga vremena. Dok smo selili stvari z tih gorici nasledili smo desetak slika “golišavih dekli” z nekakvoga američkog časopisa. V ono je vreme to bilo kakti jako atraktivno no ak bi to usporedili z današnjim sličicama z novini, ili nedaj bože z interneta, te su djevojčice više sličile opaticama i mogle bi se pojaviti i v nekakvim novinama za decu.

Mi smo takaj jedno vreme održavali tradiciju nedelnih obedi al kraj kojekakvih drugih prigodi teško je bilo nastaviti i tak nekaj. Mi smo se nekak više hitili na petke i subote, imendane, rođendane i zapovedane vinske svetke. Moram spomenuti još nekaj kaj je bila tradicija Pavlovićeve familije. Kak su se i deda i vnuk zvali Andrija, Jendraševo, 30. 11., nije se moglo slaviti skupa na jednom mestu. Zamislite gužvu koja bi nastala da se skupe dve-tri generacije odjemput na istome mestu. Znalo se: deda Jendraš slavi doma z preštimanim gostima a vnuk Andrica ze svojom klapom v goricama. No posle dedinoga odlaska moj je kum Fjaka Jendraševo desetlečima slavil takaj doma. To je navek bil jedan pravi gastronomski događaj v kojem sam i ja tu i tam imal prilike sudelovati.

Kak ste mogli do sad prečitati vu Fjakinim sam goricama furt visel. I v svetek i v petek.

Nije meni baš došla nekakva prevelika volja za delati gorice al me je vlekla želja da imam i ja nekaj mam tu do kuma. I ukazala se prilika. Levi Fjakim međaš Rok je bil več gospon v letima, nije imal dece pa ni nekoga bližega da ga nasledi. Slutili smo da bi to mogla biti prilika kupiti “jeftine gorice”. Tu i tam bi onak sramežljivo pitali međaša da jel bi on prodal gorice al je navek bil nekak neodređen. Samo je obečal da bu, dok odluči prodati, najprije rekel nama. Kak je to bilo vreme mode kupovanja gorici znali smo da ih bu prodal dok si rekel keks. I dok smo tak jemput sedeli na podolju z gemištom v ruki zove on mene i veli:”Ak ste još navek zainteresirani dojdite sutra na dogovor!” I fakat. Dojdem ja drugi dan v pratnji jednog prijatela pravnika da mam napravimo ugovor. Pitam ja za cenu i skoro se zmrznem kak su bile “jeftine”. Ni bilo nikakvoga cenkanja ali ni odustajanja. Samo mi je rekel:”Sutra donesite kaparu a do kraja meseca isplata. V posed morete dojti mam sutra!” Kak sam skupil peneze za te “jeftine” gorice najte me ni pitati al sam uspel. I tak sam vam ja 1. 6. ovoga leta obilježil četrdesetu obletnicu kak sam ponosni vlasnik gorici v Draganovcu v Mirnom dolu.

Pondelek

Juha: Prežgana juha z krutonima
Glavno jelo: Kajgana z malo špeka, zdela zelene šalate
Desert: Kifli od jučer

Tork

Juha/Glavno jelo: Čušpajz od poriluka, dinstani bočing
Desert: Sok ili malo nekakvoga voča

Sreda

Juha: Paradajzova juha z noklecima
Glavno jelo: Krmenadli na naglo, pomfrit, šalata
Desert: Vočna šalata

Četrtek

Juha: Krem juha od mešanoga povrča
Glavno jelo: Saft od svinjske lopatice, nekakva testenina
Desert: Dobra bu i zdena voda

Petek

Juha:Krem juha od kozica
Glavno jelo: Punjene lignje, blitva i krumpir
Desert: Čaša vina

Subota

Juha: Prevruče je za juhu
Glavno jelo: Pileča jetrica z kuruznim žgancima
Desert: Medenjaki;
Đuro napravi trostruku smesu pa imamo za par dana i za vnuke

Nedela

Nek bu jedan tracionalni podravski
Juha: Juha od pilečeg sitniša z vrhnjem
Glavno jelo: Pohana piletina, rizibizi;
šalata more a i ne mora biti
Desert: Kifli z pekmezom

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.