A kaj da danas kuham? (397)

Kak bum to preživel?

Nisam ni v snu mogel pomisliti da bu samo dan iza mojega rođendana takva buka i nered v našoj kući. Da bi to mogli razmeio moram vam malo pojasniti zaduženja v našoj dvočlanoj obitelji. Kaj ja delam to ste odavno već saznali: nabavljam namirnice za kuhinju, kuham za Đuru i mene i naravno za Jana i Đurinu decu dok tu i tam dolaze na obed. Naravno da su tu gorice i sve kaj se tam događa i onaj redoviti posel oko pisanja ovoga bloga i obaveze oko Udruge. Sve pak ono oko održavanja kuće je Đurina zadaća. I naravno pečenje kolača. To bi sve bilo v redu, kuća se furt mora održavati kak bog zapoveda, ali se pitam jel baš svaki posel za svako doba leta. I još nekaj: treba li se naručitelj takvih poslova, tj Đuro, ponekad malo pospominjati z onim koj bu to na kraju platil? A znate dobro da majstore treba platiti mam i to uglavnom v kešovini. Sad bute čuli kaj se meni dogodilo ovih par zadnjih dana.

Opločavanje zida v kleti

Tak smo lepo uživali v toplini kuhinjke v kleti dok se ni dogodilo nekaj iznenada. Moja je nećakinja Jelena renovirala kuću v Zagrebu i majstori su skinuli nekakve ploče/pločice z kojima nisu znali kam i kud. Onda pita Jelena Đuru:“Čuj. Kaj to nebi pasalo da zid iznad peći v goricama“. Odgovor je bil munjevit:“Baš si se dobro setila. Već dugo sam razmišljala da se taj zid oploči“. Te su pločice završile pri nama v Draganovcu al dok je došel majstor ustanovil je da to nebu dost za celi zid. Kaj sad? Kupi Ivane dodatne kvadrate pločica, lepilo i još nekaj, plati majstora i celi ga dan hrani i poji. To smo nekak na pol zbavili. Najme kaj. Pločice su samo na delu zida al majstor ni natrag složil one držače kuhinjskih krpa kak  ni zašarafil ni poličicu začinima. Navodno to čeka lepša proletna vremena. Ni posel zec. A gde mi buju do tad stajale krpe i začini? Kak da si čovek sad pomogne? Šuti trpi i plati.

Knauf v dnevnom boravku

Pri nama to ovak ide. Najprije počinje tiha verbalna paljba:“Znaš ja mislim da bi ovaj zid već trebalo prefarbati!“ Moj je odgovor:“Dobro. Bumo vidli“. Onda je dva-tri tjedna mir al sledi nova dramatična rečenica:“Znaš da ovaj zid dost vlači a i jako je zdeni. Mislim da bi tu trebalo deti knaufa!“ Moj odgovor znate:“Dobro. Bumo vidli“. I tak se to ponovilo nekolko put od proljetos. I taman dok sam mislil da se v prosincu nemre više ništ dramatično dogoditi veli meni Đuro: „Čuj danas dolaze majstori!“  Bil sam nekak uveren da je to već zaboravljena stvar kad skužim da je stvar jako ozbiljna jer se Đuro jutros digla pol vure prije nego obićno. Ostal sam se još malo pretezati v krevetu dok je ona v doljnjem boravku počela delati reda i iznašati kojekakve drangulije  v predsoblje i moju radnu sobu. I kaj da vam velim? Majstori su od osme vure počeli delati rusvaja i z mira napravili nemira i buku. Razvlačiju najlona za zaštitu, zvrndaju z bušilicama, nabijaju po zidu z čekićima. Jednom rečju: đumbus. Najgorja je stvar pak to kaj su nam našu Mimi totalno izbezumili. Nezna gde je, išče si svoje stalno mesto, mijauče, ode v dvorište pa se vrne i tak celo jutro. Moral bum tužiti majstore za nanošenje duševnih boli i Mimi i meni. Kak bu to dugo trajalo? Nemam pojma. Đuro i majstor tvrde „samo dva dana“. Nikome ja ne verujem.  Onaj v goricama je rekel da bu gotov za dve vure a delal je do večeri i još ni završil. Kak bu ovaj dugo bumo vidli. Sve mi bu jasno dok mi majstor pod nos dene računa. Zaboravil sam reči da je Đuro ovoga nabavila prek veze. Toga se i bojim. Ti prek veze su opasni jer ti kakti delaju „velku usluga jer su morali puno toga odgoditi samo da bi nama to završili“. Bar s tim imam velka iskustva. Uglavnom. Zaprl sam se v moju radnu sobu, puštam si moje najdraže CD-e i držim živce na hozintregerima. Ljudi zdrže robiju od dvajst let pa bum i ja ta dva dana. Zanimljivo mi je samo v svemu tome videti kak Đuro leti po kući oko majstori i pokušava nekak smiriti moju nervozu. Čula bu ona mene dok majstori odu.

Nisam saznal još, bar do jedanajste vure, trebam li ih nahraniti ili buju na mojoj košti? Doduše imam kojekakvih ostanjki od rođendana pa se bumo rešimo svega onoga kaj se nama ne jede.

Posledice rođendana

Znate kak već to ide: ostalo je koječega od rođendana kaj se mora pojesti. Prošli smo tjedan jeli kojekakve ostanjke a dio je završil v škrinji. To moramo nekak potrošiti do Božića i Novoga leta tak da od 1. 1. 2019. moremo krenuti v novi život. Mene su vam negda v mladosti moji z klape jedno vreme  zafrkavali: „Kaj pak od pondelka krečeš v novi život?“.  Radilo se o tome da sam posle vojske bil malo nestašan  i navek bi  znal malo neoprezno izgovoriti onu čuvenu rečenicu koju sigurno i vi pamtite:“Od pondelka novi život“. Kak sam dugo išel v novi život više se ne sečam al mi v ovim letima to više i ni nekakva pretnja nego realnost. Novi život je pri meni sad nekakva konstanta.

Pondelek

Juha/Glavno jelo: Imam povrtnicu pa bum ju naribal i zmešal z dva-tri kuhana jajca i sve začinil z koščićnim uljem.
Desert: Kolač od jučer, naravno

Tork

Juha: Krem juha od mešanih semenki z krutonima
Glavno jelo:  Pečenice, kiselo zelje i kuhani krumpir
Desert:  Kompot od trešnji; Đuro je neki dan otkrila da imamo par flašici toga kompota od prošloga lete kaj me jako razveselilo. Fakat je odličan.

Sreda

Dolazi Jan pa bu kobasičja juha češće na jelovniku
Juha: Kobasičja juha z rezancima
Glavno jelo: Špagete ala francuski krumpir, šalata; Jan je otkril kak su ovakve špagete bolše nego klasični francuski krumpir z čim se njegva baka Đuro baš ne slaže.
Desert: Rafaelo kuglice; to sam neki dan kupil Đuri al je Jan rekel da ni on nema ništ protiv njih

Četrtek

Juha: Juha od mešanoga povrća
Glavno jelo: Pečena špicrebra, krumpir, šalata od friškoga zelja
Desert: Smuti od koječega

Petek

Juha/Glavno jelo: V zelje od kolinja bum samo hitil šaku-dve graha. To je najbolši grah zeljem kojega morete zamisliti. Naravno da v tom zelju ima i kuhanoga mesa.
Desert: Palačinke z pekmezom; tu se Đuro, Jan i ja navek podelimo: oni jedu z kiselkastim pekmezom od marelice ili zelenoga paradajza a ja svoj najdraži od breskvi.

Subota

Verojatno već pogađate da bu danas testenina
Juha: Juha od testenine v kojoj su se kuhali rezanci
Glavno jelo: Rezanci z makom ili morti zapečeni sirom; to bum odlučil v zadnji čas jer moram delati posebno za Đuru a posebno za sebe.
Desert: Mandarine ili jabuke? Već prema raspoloženju v tom momentu.

Nedela

Navek se najdu dobri ljudi kaj nam nekaj poklone. Neki dan smo dobili od prijatelja z Gole tri lepa očišćena fazana pa ih bum iskoristil. Osim toga mi na obed dojde kum Taso koj je šećeraš pa moram skuhati nekaj lagano
Juha: Fazanova juha;v tu juhu denem dost povrća ali i meso od lošijih delova kuhanoga fazana
Glavno jelo: Kuhani fazan v sosu od češnjaka ili hrena, pire od mrkve i graška; dok sam to negda davno jel v Baranji kod prijatelja Željka njegva je mama složila sos od višnji kaj mi je baš pasalo.
Desert: „Trostruki užitak“; odličan kolač kojega vole pojesti deca ali bome i odrasli.