A kaj da danas kuham? (287)

Prvo Martinje bez kuma Fjake  

Odavno sam negde prečital, a naravno i puno put čul, da jedan narod čine tradicija, običaji i jezik. Ak je to tak za narod kaj nebi bilo i za jednu klapu prijatelja koji fakat jako držiju do tradicije goričarenja, a posebno Martinja i Vincekova. Tradicija ovih svetki je v kleti obitelji Pavlović počela morti i pred stotinjak let dok je deda Andro napravil klet koja još i danas ponosno stoji a verovatno je jedna od najstareših v našem kraju. Uz tu klet i te gorice je vezana jedna lepa priča, malo neobična, obzirom na vreme dok je nastala. Kak je deda Andro bil poznati koprivnički obrtnik, imal je pilanu, tišljeraj i pogrebno poduzeće, mogel si je dozvoliti malo “luksuza”. Ta je klet naime prva montažna klet v čitavoj Podravini. Deda je imal dost radnika al i znanja, škole je negda zbavil za vreme Austriougarske v Beču, pa je sve drvene elemente za klet napravil v svojem tišljeraju i sve to onda dal lepo zmontirati na podolju v Draganovcu. Onda su došli zidari i zazidali one “rupe” između drvenoga kostura. Mi bi to rekli da su zidali “med čepe”.  Nebute verovali da je to drvo i danadanas zdravo i dobro držeče. Svakih se par let samo malo osveži z nekakvom tekučinom da se spreče v svojoj nameri crvi. Uz klet su podignute i prve gorice na plantažu v našemu kraju z hiljadu trsi talijanske graševine. I dok je deda sve to lepo napravil moral je toj kleti udahnuti i dušu. I tak je počelo. Deda je bil silno društen čovek i letima je okupljal oko sebe pajdašiju, a nije mu bilo strano ni žensko društvo. Imal je lepi običaj nedelnih obiteljskih obedi v goricama gde mu je glavni kuhar bil njegov prijatelj Čiko Ilić, poznati koprivnički advokat. Kak sam ja još prije dedinog odlaska tam gore počel već kuhati v toj kleti, od Čike sam nasledil frtuna z natpisom “Čiko” kojega i dan-danas imam za uspomenu. Da se vinski sveci moraju poštivati brzo smo prihvatili i mi mlajši jer smo ih slavili koje leto još i z dedom, a nakon njega, dok je kum Fjaka nasledil gorice to je postala čak i “obaveza” obzirom da je deda gorice ostavil vnuku a ne sinu. Samo da spomenem kaj je v Pavlovićevoj familiji i tradicija da muška deca dobivaju ime po dedi. Tak je i moj kum Fjaka dobil po dedi ime Andrija, a njegov sin Vilko po Fjakinom ocu.

Već sam v jednom tekstu ranije napisal da sam v te gorice došel kak maturant pred više od pedeset let, upoznal se z dedom, koj je me “zarazil” z goricama i tom neponovljivom atmosferom. Pred par dana sam se malo prisetil mojih početki slavljenja Martinja v tim goricama i zaključil da tu vinsku svetkovinu nisam preskočil čak i ono leto dom sam bil vu vojski. Potrefilo se da vu vojslu idem iza Martinja 25. 11. a doma sam došel 25. 10. sledeće leto pak taman pred Martinje.  Naravno da me od prvoga dolaska v gorice zapala kuhača sve dok pred desetak-petnajst let nije glavna kuhača postal naš prijatelj Hus. Na meni je pak ostala nabava svega kaj nam za taj dan treba. To vam je desetlećima zgledalo ovak: Par dana prije kuma Fjaka nazove i pita:”Kume! Znaš ti da je Martinje pred vratima? Moramo se najti i dogovoriti kaj treba pripremiti.” Naravno da sam znal kak je priprema jako važna. Ja onda napravim listu z namirnicama, kum dojde po mene i sledi nabava. Svaka je najvažneša nabava guski. Svojedobno smo imali malih problema jer baš ni bilo moguće nabaviti odgovarajuće guske. Ili su bile premale, ili prestare ili pak one uvozne mađarske ni na zgled nisu baš bile za poslužiti ovak odabranom gurmanskom društvu kak smo mi. No zadnjih dvadesetak let imamo stalni izvor nabave v Goli, najvećem prekodravskom selu, pri Slavi jednoj pravoj gazdarici koja nas do sad još ni izneverila. Guske su naravno lepo očišćene i meni ostaje samo dan prije da ih nasolim i nafilam z mesnim nadjevom. Tak pripremljene na samo Martinje predam Husu, našem sadašnjem šefu kuhinje, a njegovo je da ih speče tak kaj buju pomazile i oko i nepce.

Na samo Martinje prva ekipa odlazi v gorice već oko devete vure jer ostatak ekipe dolazi dve-tri vure kasneše. Čim se dojde v klet treba popiti rakijicu protiv upale pluča, to je takaj tradicija još od dede, morta se zakuriti peć i naravno pripremiti prvi obrok. Ti prvi zalogaji su navek dost bogati i traju fest dugo. Ima tu špeka, jegera, čvarki, dve tri vrsti sira, luka pa čak i pečenih crnih maslina koje naš prijatelj Joso redovno donosi Zagreba. Nebu izostala čuvena Bočova pogača. Posle tak izazovnog gableca već paše i gemišt. V međuvremenu je Hus del dinstat gušćje iznutrice: želuce, srca, drape, vratove, kaj bu jedno toplo predjelo koje svi obožavamo. Morti je najbolje od toga umakanje kruha v taj pikantni saft. Guske z hajdinskom kašom i mešanim friškim zeljem je naravno obed. Osim gemišta za desert je već tradicionalna Krakojeva kuruzna zlevanjka. Svaki si najde svoj komadić guske a neki od nas se posebno vesele filu pogotovo ak je začinjen onak kak to v ovakvom ambijenti i paše. Naš pokojni pajdaš Čvrknja je znal reči: “Čuj Mali. Ja kupim mleveno meso a ti buš zbučkal toga fila!” Naravno da bum dragi prijatelj. 

Sad je već vreme i za “ozbiljan posel”. Biskup se mora pripremiti za krštenje mošta, mora odabrati svoje miništrante i pomoćnike kak i  ostale potrepštine za jedan tak veliki događaj.  Zapraf vam moram nekaj priznati. Mošta retko ko od nas i pije. Koštamo ga dok se pokrsti a nekak po naviki pijemo staro vino. Mlado vino oće biti jako nestašno i varljivo.

V takvoj atmosferi brzo bu pala popevka, kum Tinča bu zel harmoniku a moglo bi se lako dogodi da neko odrecitira i koju poznatu Galovićevu.

Da bi vam dočaral dio ambijenta našega goričarenja ovaj put bum dodal neke sličice.

Joso i Atač su naši najčešći biškupi.

Ak slučajno niste prepoznali moj “bubanj” bu vam rekel. To je puta. V njoj se nosi za vreme berbe grožđe.

Kak morete videti na sliki prošlo leto je za Martinje bilo prekrasno vreme pa smo mogli čak i v studenom sedeti ispred kleti.

Sve kaj sam vam do sad spripovedal se fakat događalo i tak zgledalo desetljećima. Ovo se leto bu dogodila jedna velika promena. Ne v pogledu jelovnika ili ceremonijala kolko bu nastala jedna ogromna praznima bez čoveka koj je bil od navek centar našega goričkoga okupljanja. Oko nabave moram nekaj napraviti sam, a ambijent Fjakine kleti bumo zamenili z mojom kleti koja je udaljena svega dvadesetak metri. Tek sad vidim kak sam bil dalekovidan pred 36 let kaj sam kupil gorice do kuma. Pajdašija se bu pak skupila oko devete vure i pak bu pala rakijica al ovaj put za pokoj duše našega velkoga pajdaša Fjake i svih ostalih koji sun as napustili ovih par let: Joška, Čvrknje i Boboja.  Već smo davno odlučili održavati tu tradiciju i verujem da ju nebumo izneverili. Naš prijatelj Joso, koj redovito dolazi Zagreba na ta naša okupljanja, kak i  Boč i Atač, je jemput na pitanja kak se bumo dugo okupljali, rekel: “Tak dugo dok ne ostane zadnji. On bu zaprl svetlo i zgasil jednu prelepu velku tradiciji”. To bu onda konačni fajrunt.Srećom kaj neznamo ko bu taj i kak bu sve to dugo trajalo. Još samo nekaj. Iza kuma Fjake je ostal sin Vilko kak naslednik gorici. Puno je mlađi od nas al se nadam da nas bu došel pozdraviti i popiti z nama jednu za svoga oca, našeg velikog pajdaša i čoveka koj nas je desetljećima okupljal i ponudil nam toplinu svoje kleti. Dragi prijetelju i kume: Na Martinje buš pak z nama kak je to bilo od navek. Popili bumo koju “vu vinkl” za pokoj tvoje duše.        

Pondelek

Juha: Imam od jučer kuhano povrće z juhe pa bum napravil povrtnu krem juhu.
Glavno jelo: Roštiljke z pomfritom
Desert: Ledeni veter od jučer

Tork

Juha/Glavno jelo: Ćoravi gulaš; imam kojekakve falačece mesa pa bum pojačak krumpira
Desert: Fritulice

Sreda

Juha/Glavno jelo: Čušpajz od poriluka z kranjskima; Đuri su doktori rekli da je poriluk dobar protiv kolesterola pa ga saki čas imamo na jelovniku.
Desert: Puding od čokolade

Četrtek

Obzirom da je sutra Martinje riba bu danas
Juha: Riblja juha od zmrznutog oslića
Glavno jelo: Rižoto od lignji; znate i sami da to išće dost parmezana
Desert: A kaj drugo nego čaša moje graševine

Petek

Na današnji dan pada Martinje pa pogledajte kaj bumo moja pajdašija i ja blagovali. Morti vam se nekaj dopadne.

Subota

Juha/Glavno jelo: Mislim da bu danas najbolje pasala nekakva kisela juha; recimo od pilećih želuci
Desert: Fala bogu kaj imamo v podrumu domaćih sokova na izbor

Nedela

Juha: Jedna moćna juha od junećih kostiju z rezancima i kašicom
Glavno jelo: Bočing u saftu od povrća, domaći široki rezanci, šalata
Desert: Lisnato z makom, kapučino